Miqren tutması zamanı nə etməli

Miqren tutması başlayanda ən vacib addım dərmanı gecikdirmədən, ağrının əvvəlində qəbul etməkdir. Sonra mümkünsə qaranlıq və sakit otağa çəkilin, bir neçə qurtum su için və uzanın. Alına və ya boyuna qoyulan soyuq kompres çox adama yüngüllük verir.

İlk 30 dəqiqə

1. Həkimin təyin etdiyi dərmanı qəbul edin. Ağrı güclənənə qədər gözləməyin. Tutma zamanı dərmanlar ağrının ilk saatında daha yaxşı təsir edir.
2. İşığı və səsi azaldın. Pərdələri bağlayın, ekranı söndürün. Ekrana baxmaq lazımdırsa, parlaqlığı ən aşağı səviyyəyə endirin.
3. Su için. Ürəkbulanma varsa, kiçik qurtumlarla.
4. Soyuq kompres. Dəsmala bükülmüş buz alına, gicgaha və ya ənsəyə 10–15 dəqiqə qoyulur.
5. Uzanın və mümkünsə yatın. Bir çox xəstədə yuxu tutmanı dayandırır.

Nə etməmək lazımdır

• Eyni gündə bir neçə müxtəlif ağrıkəsicini ardıcıl qəbul etməyin.
• Kofeinli içkiləri artıq içməyin. Bir fincan çay və ya qəhvə bəzən kömək edir, amma gündəlik çox kofein tutmaları artırır.
• Ağrı keçən kimi ağır işə qayıtmayın. Postdrom dövründə orqanizmin bərpaya ehtiyacı var.

Tutma iş yerində başlayıbsa

Dərmanı həmişə yanınızda saxlayın: çantada, iş masasında, avtomobildə. Mümkünsə işıqları zəif bir otağa keçin, ekranın parlaqlığını azaldın. Tutmalar tez-tez işdən qalmağa səbəb olursa, bu, profilaktik müalicə barədə həkimlə danışmaq üçün kifayət qədər əsasdır.

Uşaqda tutma

Uşağı qaranlıq otaqda uzandırın, su verin. Uşaqlarda tutma böyüklərə nisbətən qısa olur və tez-tez yuxudan sonra keçir. Dərmanı və dozanı uşaq nevroloqu və ya pediatr təyin etməlidir. Ətraflı: Uşaqlarda miqren.

Nə vaxt təcili yardım çağırmalı

Bu baş ağrısı adi tutmalarınızdan fərqlənirsə, 103-ə zəng edin:

• ağrı bir anda, saniyələr ərzində ən güclü həddə çatıb;
• yüksək hərarət və boyunda gərginlik var;
• bədənin bir tərəfində zəiflik, üzdə əyilmə, danışmaqda çətinlik var;
• huş qarışıqlığı, qıcolma olub;
• ağrı başa zərbədən sonra başlayıb.